::: Stórleikur!
Það er best að ég skrifi þessa bloggfærslu svo að hógværð Sóleyjar skyggi ekki á sannleikann. :-) Hún er heldur ekki heima, hún er að fagna!

Staðreyndin er sú að Sóley átti stórleik í dag og átti ásamt fleirum þátt í að tryggja liði sínu sigur og áframhaldandi sæti í fyrstu deild í þriðja leik og hreinum úrslitaleik um sætið. Sóley lék allan leikinn og varði örugglega meira en 20 skot! Það byrjaði þó ekki vel því andstæðingarnir, Gladsaxe-konur, komust 0-4 yfir! En Rødovre-píur náðu að jafna 4-4 og sigu svo jafnt og þétt fram úr. Þær höfðu lengst af 4-6 marka forystu en tókst að hrista af sér andstæðingana í lokin og náðu mest níu marka forystu. Liðið lék að þessu sinni betur en ég hef séð í vetur og margir að sýna sitt allra besta, þeirra á meðal Heiða liðsfélagi Sóleyjar í Rødovre. Lokatölur 30-23.

Þetta er vitanlega mikill léttir fyrir Sóleyju og restina af liðinu enda svolítil vonbrigði að missa viðureignina um sæti í þrjá leiki. Og tilhugsun um fall var ekki spennandi. Nú er bara að vona að liðið nái sér á strik næsta vetur og verði að minnsta kosti í efri hlutanum.

En eins og við segjum hér úti - godt gået, Sóley!

::: Komið að tómum kofanum
Við fórum í bæinn í dag til að kjósa. En við komum að tómum kofanum. Sendiráðið var lokað. Í tilefni af sumardeginum fyrsta! Ég verð að viðurkenna að þetta kom mér í opna skjöldu. Ég vissi vel hvaða dagur var heima en mig grunaði aldrei að sendiráðið myndi loka vegna þess. "Viðskiptavinirnir", Íslendingar búsettir í Danmörku og aðrir, eru ekki í fríi og geta ekki verið að velta fyrir sér hvort það er opið í opinberum stofnunum á Íslandi eða ekki þegar þeir reka erindi í Danmörku!

Það er ljóst að sendiráðsstarfsmenn eru með íslenska kjarasamninga en ég hef þá sterklega grunaða um að taka sér líka frí á dönskum frídögum. :-) Þetta var kannski ekki alvarlegt vandamál fyrir okkur, þetta kemur ekki í veg fyrir að við kjósum. Við mætum aftur - en þó ekki 1. maí! Það er þó frídagur í báðum löndum.

Verra þótti mér að á heimasíðu sendiráðsins voru engar upplýsingar um þessa skyndilokun. Ég kíkti á vefinn til að kanna hvenær sendiráðið væri opið. Það gekk frekar illa því upplýsingar um afgreiðslutíma eru vel faldar. Eftir að hafa smellt á nokkra linka fann ég þetta þó að lokum. En það þarf ekki sérfræðinga til að sjá að vefsíðunet sendiráðanna - www.iceland.org - er meingallað og lítt notendavænt.

Gleðilegt sumar!

::: Ítalíumyndir komnar
Rétt er að vekja athygli á því að við höfum sett inn myndir frá Ítalíuferðinni okkar. Myndamöppurnar skiptast í þrennt. Í fyrstu seríunni eru myndir frá Feneyjum, þeirri einstöku borg. Í annarri myndasyrpunni er háskólabærinn Bologna kynntur í máli og myndum og í þeirri þriðju eru myndir frá ferðalagi okkar til San Marinó, Imola og Maranello.

Ætlunin var að birta ferðasöguna hér á aðalsíðunni en við ákváðum að slá tvær flugur í einu höggi. Ferðasagan er sögð í máli og myndum á myndavefnum og því eru myndatextar óvenju fyrirferðarmiklir í þetta sinn. Njótið vel!